இல்லது படைக்க வல்லன்!

கற்பாறைகளை உடைத்து தோண்டிய உவர்நீர் கிணறுகளும், வில்லால் வேட்டையாடி வாழும் மக்களும் உள்ள சிற்றூரின் வலிமைமிக்க தலைவன் மிகுந்த வறுமையுற்றிருந்தாலும் தளர்வதில்லை. பனிமிக்க மாலைப்பொழுதில் இடையன் தீக்கடைக் கோலைக் கடைந்து இல்லாத தீயை உருவாக்குவது போல, தேவையான பொருள் தன்னிடம் இல்லாதபோதும் அதை விரைவாக ஈட்டிப் படைத்து வழங்கும் ஆற்றல் அவனுக்கு உண்டு.

அவனிடம் உள்ள பொருள் மிகவும் குறைவாக இருந்தாலும், வந்திருப்போர் பலர் என்று எண்ணித் தயங்குவதில்லை. நீண்ட பந்தலில் பலருக்கும் முறைப்படி உணவு பரிமாறும் இல்லறச் சிறப்புடைய பெண்ணைப் போல, ஒவ்வொருவரின் தகுதியும் வரிசையும் அறிந்து சிறுசிறு அளவாகப் பகுத்து வழங்க வல்லவன்.

செல்வம் பெருகிய உரிய காலத்தில் அவனது கொடை அளவின்றி விரிகிறது. நாட்டைக் காக்கும் மன்னரின் மனைவாயிலில் யாவரும் பெறுமாறு தூவப்படும் பலிச்சோற்றைப் போல, தன்னிடமுள்ள செல்வத்தை வருவோர்க்கெல்லாம் வேறுபாடின்றி வாரி வழங்கும் வள்ளலாக அவன் விளங்குகிறான்.